ఎర్రగుంటపల్లి నాయకుడికి గ్రామాల నుంచి శుభాకాంక్షల వెల్లువ

కోహెడ, జూన్ 22 (కే24 న్యూస్):
కోహెడ మండలం ఎర్రగుంటపల్లి గ్రామానికి చెందిన సీనియర్ కాంగ్రెస్ నాయకుడు శెట్టి సుధాకర్ కోహెడ మండల కాంగ్రెస్ పార్టీ నూతన అధ్యక్షుడిగా ఎన్నిక కావడంతో మండల వ్యాప్తంగా హర్షాతిరేకాలు వ్యక్తమవుతున్నాయి. వివిధ గ్రామాల ప్రజలు, పార్టీ నాయకులు, కార్యకర్తలు ఆయనకు శుభాకాంక్షలు తెలియజేస్తూ అభినందనలు వ్యక్తం చేస్తున్నారు.
కాంగ్రెస్ పార్టీ సిద్ధాంతాలకు కట్టుబడి ఎన్నో సంవత్సరాలుగా పార్టీ బలోపేతానికి కృషి చేస్తున్న శెట్టి సుధాకర్, గ్రామీణ స్థాయిలో పార్టీని ప్రజల్లోకి తీసుకెళ్లడంలో కీలక పాత్ర పోషించారు. పార్టీ కోసం నిరంతరం శ్రమిస్తూ, కార్యకర్తలకు అండగా నిలుస్తూ, ప్రజా సమస్యల పరిష్కారానికి కృషి చేసిన ఆయనకు ఈ పదవి దక్కడం పట్ల కాంగ్రెస్ శ్రేణులు ఆనందం వ్యక్తం చేస్తున్నాయి.
ప్రజలతో మమేకమై, గ్రామాల అభివృద్ధికి తన వంతు సేవలు అందించిన నాయకుడిగా సుధాకర్‌కు ప్రత్యేక గుర్తింపు ఉందని స్థానికులు పేర్కొంటున్నారు. ఆయన నాయకత్వంలో కోహెడ మండలంలో కాంగ్రెస్ పార్టీ మరింత బలోపేతం అవుతుందని, పార్టీ కార్యకలాపాలు కొత్త ఉత్సాహంతో ముందుకు సాగుతాయని నాయకులు ఆశాభావం వ్యక్తం చేశారు.
ఈ సందర్భంగా శెట్టి సుధాకర్ మాట్లాడుతూ, తనపై నమ్మకం ఉంచి బాధ్యతలు అప్పగించిన పార్టీ నాయకత్వానికి కృతజ్ఞతలు తెలిపారు. మండలంలోని ప్రతి కార్యకర్తను కలుపుకొని పార్టీ అభివృద్ధికి, ప్రజా సమస్యల పరిష్కారానికి మరింత కృషి చేస్తానని హామీ ఇచ్చారు.