సంక్షేమ పథకాల అమలు, ప్రమాద బీమా, పెన్షన్, గృహ సౌకర్యాలు కల్పించాలని డిమాండ్ – లేకపోతే రాష్ట్రవ్యాప్త ఆందోళనకు హెచ్చరిక
తెలుగు కే న్యూస్ తెలంగాణ రాష్ట్రవ్యాప్తంగా భవన నిర్మాణ కార్మికులు ఎదుర్కొంటున్న సమస్యలను ప్రభుత్వం అత్యవసరంగా పరిష్కరించాలని తెలంగాణ లేబర్ యూనియన్ (TLU) రాష్ట్ర అధ్యక్షుడు కుతాడి శివరాజ్ ప్రభుత్వాన్ని డిమాండ్ చేశారు. రాష్ట్ర ఆర్థికాభివృద్ధిలో నిర్మాణ కార్మికుల పాత్ర అత్యంత కీలకమైనదైనా, వారికి అందాల్సిన సంక్షేమ పథకాలు పూర్తిస్థాయిలో అమలు కావడం లేదని ఆయన ఆవేదన వ్యక్తం చేశారు.
ఈ సందర్భంగా ఆయన మాట్లాడుతూ, భవన నిర్మాణ కార్మికుల సంక్షేమ బోర్డును మరింత సమర్థవంతంగా నిర్వహించడంతో పాటు ప్రతి అర్హ కార్మికుడికి నమోదు ప్రక్రియను సులభతరం చేయాలని కోరారు. ప్రమాద బీమా, నాణ్యమైన ఆరోగ్య సేవలు, కార్మికుల పిల్లలకు విద్యా సహాయం, మహిళా కార్మికులకు ప్రసూతి ప్రయోజనాలు, వృద్ధాప్య పెన్షన్, గృహ సౌకర్యాలు వంటి సంక్షేమ పథకాలను పారదర్శకంగా అమలు చేయాలని ప్రభుత్వాన్ని విజ్ఞప్తి చేశారు.
నిర్మాణ పనుల్లో ప్రమాదాలకు గురై ప్రాణాలు కోల్పోయిన లేదా తీవ్రంగా గాయపడిన కార్మికుల కుటుంబాలకు తక్షణ ఆర్థిక సాయం అందించడంతో పాటు, నిర్మాణ రంగంలో ఉపాధి అవకాశాలను పెంచేందుకు ప్రత్యేక కార్యాచరణ చేపట్టాలని సూచించారు. కార్మికుల శ్రమతోనే రాష్ట్ర అభివృద్ధి సాధ్యమవుతుందని, వారి సంక్షేమాన్ని విస్మరించడం సమంజసం కాదని పేర్కొన్నారు.
భవన నిర్మాణ కార్మికుల హక్కులను కాపాడటం ప్రభుత్వ రాజ్యాంగబద్ధమైన బాధ్యత అని స్పష్టం చేసిన కుతాడి శివరాజ్, కార్మికుల న్యాయమైన డిమాండ్లను ఆలస్యం చేయకుండా వెంటనే అమలు చేయాలని కోరారు. ప్రభుత్వం నిర్లక్ష్య వైఖరిని కొనసాగిస్తే తెలంగాణ లేబర్ యూనియన్ ఆధ్వర్యంలో రాష్ట్రవ్యాప్తంగా ప్రజాస్వామ్యబద్ధమైన ఆందోళన కార్యక్రమాలు చేపడతామని హెచ్చరించారు.
