ఉక్రెయిన్‌ డ్రోన్లకు స్టార్‌షీల్డ్‌ ఆంక్షలు.. ట్రంప్‌ చేతిలో తుది నిర్ణయం

ఉక్రెయిన్‌లో సైనిక కార్యకలాపాలకు ఉపయోగిస్తున్న స్టార్‌షీల్డ్‌ శాటిలైట్‌ కమ్యూనికేషన్స్‌ వ్యవస్థపై ఆంక్షల అంశం చర్చనీయాంశంగా మారింది. ఈ వ్యవస్థ వినియోగంపై పరిమితులు విధించే అధికారం అమెరికా ప్రభుత్వానికే ఉంటుందని స్పేస్‌ఎక్స్‌ అధినేత ఎలాన్‌ మస్క్‌ స్పష్టం చేశారు. అంతిమ నిర్ణయం అమెరికా అధ్యక్షుడు డొనాల్డ్‌ ట్రంప్‌ తీసుకుంటారని పేర్కొన్నారు. యుద్ధ క్షేత్రంలో డ్రోన్‌ కార్యకలాపాలకు అంతరాయం కలుగుతోందని ఉక్రెయిన్‌ అధికారులు ఆందోళన వ్యక్తం చేస్తున్న నేపథ్యంలో మస్క్‌ వ్యాఖ్యలు ప్రాధాన్యం సంతరించుకున్నాయి.

‘ఎక్స్‌’ వేదికగా స్పందించిన మస్క్‌.. స్టార్‌షీల్డ్‌ వ్యవస్థలు అమెరికా ప్రభుత్వ యాజమాన్యంలో, నియంత్రణలో ఉంటాయని తెలిపారు. సైనిక అవసరాల కోసం రూపొందించిన స్టార్‌షీల్డ్‌కు, వాణిజ్యపరమైన స్టార్‌లింక్‌కు మధ్య వ్యత్యాసం ఉందని వివరించారు. మరోవైపు, డ్రోన్‌ కార్యకలాపాలు, వాయు రక్షణ వ్యవస్థల కోసం ఉపయోగిస్తున్న టెర్మినల్స్‌పై వేగ పరిమితులు విధించడంతో కనెక్టివిటీ దెబ్బతింటోందని ఉక్రెయిన్‌ అధికారులు చెబుతున్నారు. ఈ పరిమితులు వేగంగా కదిలే సైనిక వేదికల కార్యకలాపాలపై ప్రభావం చూపుతున్నాయని పేర్కొన్నారు.

ఉక్రెయిన్‌ మాజీ రక్షణ మంత్రి మైఖైలో ఫెడోరోవ్‌ స్టార్‌లింక్‌ కనెక్టివిటీని పునరుద్ధరిస్తున్నారని పేర్కొంటూ, స్టార్‌షీల్డ్‌పై ఉన్న పరిమితులను కూడా తొలగించాలని కోరినట్లు సమాచారం. ఉక్రెయిన్‌ అధ్యక్షుడు వొలొదిమిర్‌ జెలెన్‌స్కీ ఈ పరిణామాలపై ఆందోళన వ్యక్తం చేశారు. కమ్యూనికేషన్‌ వ్యవస్థల్లో అంతరాయాలు ప్రాణనష్టానికి దారితీయవచ్చని హెచ్చరించారు. ఈ అంశంపై అమెరికా ప్రభుత్వం అధికారికంగా స్పందించాల్సి ఉంది. యుద్ధంలో కీలకమైన శాటిలైట్‌ సాంకేతిక పరిజ్ఞానంపై నియంత్రణ ఎవరి చేతుల్లో ఉందనే అంశం ఉక్రెయిన్‌కు సవాలుగా మారింది.

ఇదీ చదవండి :: రైతులకే షరతులా..?