కోహెడ గ్రామ పంచాయతీ కార్యాలయంలో సమావేశం

కోహెడ: తెలుగు కే న్యూస్ గ్రామ పంచాయతీ కార్యాలయాన్ని ఇతర సమావేశాలకు వినియోగించడంపై బీజేపీ సిద్దిపేట జిల్లా ప్రధాన కార్యదర్శి ఖమ్మం వేంకటేశం ప్రశ్నలు లేవనెత్తారు. ప్రభుత్వ కార్యాలయాలు ప్రజాసేవకు, గ్రామ పరిపాలనకు ఉపయోగపడాలి తప్ప వ్యక్తిగత లేదా ప్రైవేటు సమావేశాలకు వేదికలుగా మారకూడదని ఆయన పేర్కొన్నారు.కోహెడ గ్రామ పంచాయతీ కార్యాలయంలో ఈరోజు సమావేశం నిర్వహించినట్లు తనకు తెలిసిందని, దీనిపై పంచాయతీ కార్యదర్శిని ప్రశ్నించగా తనకు సమాచారం లేదని తెలిపినట్లు వేంకటేశం వెల్లడించారు. ఈ సమావేశానికి ఎవరు అనుమతి ఇచ్చారు? ఏ నిబంధనల ప్రకారం పంచాయతీ భవనాన్ని వినియోగించారు? పాలకవర్గానికి, పంచాయతీ కార్యదర్శికి సమాచారం లేకుండానే సమావేశం నిర్వహించారా? అనే అంశాలపై సంబంధిత అధికారులు స్పష్టత ఇవ్వాలని ఆయన డిమాండ్ చేశారు.గ్రామ పంచాయతీ భవనం ప్రభుత్వ ఆస్తి అని, దాని వినియోగంలో పారదర్శకత, బాధ్యతాయుతమైన విధానాలు పాటించాలని వేంకటేశం అన్నారు. పంచాయతీ కార్యాలయాన్ని ఇతర కార్యక్రమాలకు ఉపయోగించేందుకు అనుమతి అవసరమా? అందుకు సంబంధించిన నిబంధనలు ఏమిటి? అనే విషయాలను అధికారులు ప్రజలకు వివరించాలని కోరారు.తెలంగాణ పంచాయతీరాజ్ చట్టం, 2018లోని నిబంధనలను ప్రస్తావిస్తూ, పంచాయతీ కార్యాలయ వినియోగంపై చట్టపరమైన అంశాలను అధికారులు పరిశీలించాలని ఆయన సూచించారు. సమావేశం నిర్వహణకు అనుమతి ఇచ్చారా? ఇచ్చి ఉంటే ఎవరు ఇచ్చారు? ఏ ప్రాతిపదికన అనుమతి మంజూరు చేశారు? అనే వివరాలను వెల్లడించాలని కోరారు.ప్రజలకు జవాబుదారీతనంతో కూడిన పాలన అందించాల్సిన ప్రభుత్వ వ్యవస్థలో ఇలాంటి ప్రశ్నలు తలెత్తడం ఆందోళనకరమని వేంకటేశం వ్యాఖ్యానించారు. ఈ వ్యవహారంపై రాష్ట్ర మంత్రి పొన్నం ప్రభాకర్ గౌడ్ స్పందించాలని, సంబంధిత పంచాయతీరాజ్ అధికారులు విచారణ జరిపి వాస్తవాలను ప్రజలకు తెలియజేయాలని ఆయన డిమాండ్ చేశారు.పంచాయతీ కార్యాలయంలో సమావేశం నిర్వహించిన తీరుపై సంబంధిత అధికారులు స్పష్టత ఇవ్వాలని బీజేపీ నేత ఖమ్మం వేంకటేశం కోరారు.

ఇదీ చదవండి :: రైతులకే షరతులా..?